O Concello de Covelo vén de realizar accións de recuperación de hábitats de interese comunitario e mellora da utilidade pública na zona de especial conservación do río Tea dentro do Termo Municipal. Os traballos desenvolvéronse ao abeiro dunha axuda para a realización de investimentos ligados a obxectivos agroambientais e climáticos en concellos incluídos na Rede Natura 2000, e no marco dun convenio coa Dirección Xeral de Patrimonio Natural da Xunta de Galicia.
Deste xeito, neste proxecto, tense recuperado para uso público dentro do roteiro AQA, o primeiro tramo da levada que conducía a auga de rego dende o río Tea en Maceira ata o barrio de Redondo en Barcia de Mera, e restauráronse os pasos Porta Liñares no rego San Breixo ó paso do roteiro dos Carranos pola parroquia de Maceira.
No mesmo período de traballo, durante os meses de setembro e outubro, tamén se desenvolveron accións de conservación no bosque de sobreiras de Chan de Mons na parroquia de Barcia de Mera, unha das mellores masas de Quercus suberda comarca de Condado-Paradanta. Os traballos consistiron nunha roza preventiva da matogueira en 3,5 Ha de superficie ocupada polos corticeiros e na eliminación das especies invasoras como o eucalipto e a acacia.
O proxecto viuse complementado por actuacións de mellora da accesibilidade e sinalización na Rede Municipal de Roteiros do Concello de Covelo.
