O Concello de Arbo e as dúas asociacións afectadas continúan coa loita contra a liña de alta tensión Fontefría-Fronteira portuguesa.
Todos os recursos presentados con anterioridade foron rexeitados, así tamén terminou o prazo legalmente establecido para o ditame de resolución, por parte da Dirección Xeral de Política Enerxética e Minas, con respecto do requirimento de anulación formulado polo Concello fronte á Resolución de data do 22 de decembro de 2022, da Dirección Xeral de Política Enerxética e Minas, sendo desestimado o citado requirimento de anulación por parte do Goberno de España.
Despois de que todos estes recursos foran rexeitados, Concello e asociacións procederon a interpoñer un recurso contencioso-administrativo no xulgado, reiterando así o seu “non” a dita liña de alta tensión, contando tamén co apoio incondicional dos veciños.
Ademais, o concello de Arbo conta co apoio das vilas veciñas das Neves, Monçao e Melgaço, o que representa unha grande axuda.