O pleno do Concello da Cañiza que comezou cun minuto de silencio polas vítimas do naufraxio do ‘Villa de Pitanxo’ por iniciativa da Alcaldía, derivou, segundo denuncian os socialistas cañicenses “nun envío continuado de insultos e de sonoros bicos por parte do voceiro do PP da Cañiza contra o alcalde Luís Piña”.
O grupo municipal popular solicitou a celebración dun pleno extraordinario para expoñer unha lista de investimentos, cunha memoria económica que, ao entender do PSOE, foi “feita sen ningún rigor, que máis parecía unha carta aos reis magos, nas súas peticións, e o conto da leiteira, nas súas esperanzas de ingresos, que unha iniciativa política seria” xa que, afirman, se presentaban unha serie de propostas, cun valor económico atribuído a cada una, “sen ningún tipo de rigor real”.
Como exemplos poñen os socialistas a construción dun albergue e dun centro de interpretación para a Vía Mariana enParada “atribuíndolle 150.000 € de custo” can os proxectos para estas dúas obras “encargados polo anterior alcalde popular e aínda sen pagar” son de 181 000 € e 687 000 €, respectivamente.
O alcalde Luis Piña rebateu todas as propostas populares con datos. A resposta do portavoz popular, denuncia o PSOE local, foron os insultos “cobarde… pouco hábil… falto de luces, e mencións persoais contra a familia do alcalde e o sonoro envío de bicos ante a sorpresa dos concelleiros presentes”.
