O alcalde da Cañiza, Luis Piña, recibiu onte nas dependencias da Alcaldía ao novo subcampeón de España de BTT Enduro categoría Master 30, Santos Lemos, un dos deportistas do Club Ciclista Grupeta Pan de Zarco, equipo deportivo que na actualidade ten a súa sede na Cañiza.
Santos Lemos, que por segundo ano consecutivo revalida esta posición, conseguiu a segunda clasificación nun duro campionato celebrado na localidade coruñesa de Mugardos e Chanteiro no que participaron 300 ciclistas. Foi unha complexa proba cun desnivel de 1.240 metros e un percorrido de cinco treitos cronometrados e outros cinco de enlace que completaban os 32 quilómetros do circuito.
Luis Piña non dubidou en asegurar que “A Cañiza está de parabén polos logros deportivos acadados pola nosa xente esta fin de semana”. Cómpre salientar que o éxito de Santos Lemos engádese ao triunfo do balónman feminino.
O Goberno da Cañiza asumiu o compromiso de colaborar cos club locais xa que “o esforzo, bo facer e triunfos dos nosos deportistas consiguen poñer o foco no noso Concello, dando a coñecer o nome da Cañiza por toda a xeografía galega e mesmo nacional”, subliñou o alcalde.
