O alcalde da Cañiza, Luis Piña, reuniuse o pasado martes 27 de xullo no Ministerio de Transportes, Mobilidade e Axenda Urbana co Secretario General de Infraestruturas, Sergio Vázquez.
Nesta reunión informóuselle de que a Secretaría de Estado da luz verde á solicitude do reasfaltado do firme da N-120, en todo o tramo urbano e noutros especialmente deteriorados da estrada ata o túnel, no termo municipal de Covelo, cun investimento de 800.000€.
Dende a apertura do Tunel de Folgoso, a principios de maio deste ano, dende a alcaldía se estivo traballando para conseguir que se reasfaltara o firme en toda a travesía da N-120 ao seu paso pola Cañiza ademáis doutros tramos xa fora do casco urbano.
O pasado 4 de maio, o alcalde notificou oficialmente á Secretaría de Estado de Transportes, á Demarcación de Carreteras del Estado en Galicia e en Pontevedra e a Delegación do Goberno de España en Galicia e Subdelegación de Pontevedra, do estado intransitable en que quedou o firme da estrada Nacional 120 na súa travesía polo casco urbano da Cañiza, con motivo do peche do túnel da A-52 Rías Baixas en sentido Vigo Ourense.
O túnel de O Folgoso estivo pechado durante 3 meses, dende o 21 de xaneiro ao 30 de abril, debido ao accidente dun camión de grandes dimensións que se incendiou dentro do túnel, provocando graves danos nas súas infraestruturas.
O peche obrigou a desviar todo o tráfico da Autovía pola N-120, ocasionando un importante deterioro na calzada que non estaba preparada para absorber tal volume e densidade de tráfico.
Esta problemática foi tratada nunha reunión de traballo celebrada o pasado 20 de maio na Subdelegación do Goberno en Pontevedra na que estiveron presentes ademáis do alcalde Luis Piña e a subdelegada Maica Larriba, os máximos responsables de estradas do Estado en Galicia e Pontevedra, Ángel González e Pablo Domínguez. Na reunión celebrada onte en Madrid tamén participaron pero por videoconferencia. A mesa de traballo completouse coa asistencia dos asesores do Secretario de Estado e o asesor da Ministra.
Despois desta xuntanza o Secretario de Estado reuniuse co alcalde para tratar sobre outros temas de interese para o Concello da Cañiza, relacionados con obras en infraestruturas.
