A empresa Aramark será a que finalmente estree a cociña escolar municipal construída polo Concello de Nigrán no CEIP Humberto Juanes para elaborar os menús dos colexios públicos do municipio desde o vindeiro curso (todos agás o CPI Arquitecto Palacios e CEE de Panxón, que dispoñen de cociña propia). Trátase dun cambio histórico na alimentación dos escolares da localidade, que ata o de agora recibían a comida de caterings situados a centos de kilómetros (os colexios de Nigrán tiñan o pasado curso un total de 561 comensais asignados e desde a nova cociña poderían asumirse ata 1.000).

“Agora está nas mans de Aramark que haxa un salto de calidade e así nolo transmitiron eles tamén, desde o Concello dispuxemos de todos os medios para que así fose investindo 373.878 € na construción da cociña”, comenta o alcalde, Juan González. Para chegar ata este punto, a presión de máis dun ano de toda a comunidade educativa e do Concello traducíuse nuns novos plegos de concesión da Xunta que, ademais de recoñecer finalmente esta instalación como válida, redestribuíu os lotes para que a comida do CEIP Humberto Juanes, Mallón, Carlos Casares e Da Cruz (lote 21) se elabore exclusivamente aquí. “O investimento pagou a pena porque doutro xeito, sen mobilizarnos xunto á comunidade educativa, nada tería cambiado: seguiría a cociñar un catering ubicado a centos de kilómetros, como ata agora. O resultado non pode ser máis gratificante porque foron anos de loita conxunta en favor da saúde e o benestar das nosas crianzas. Este é parte do Nigrán para todos que buscamos”, resume González.

A nova concesionaria foi a gañadora de entre cinco empresas presentadas ao concurso público da Xunta, que partía dun prezo unitario de 5,83 + IVE. Así, descalificáronse as dúas que mellor oferta económica presentaran (4,45 € e 4,49 € respectivamente) ao considerar que realizaban unha baixa temeraria non xustificada e, finalmente, gañou Aramark cunha oferta de 4’77 €+IVE. Ademais, entre as cuestión que puntuaron favorablemente para esta empresa foi o compromiso de incluír produtos de tempada en todos os menús, que un 10% sexan ecolóxicos e que máis dun 50% dos proveedores sexan locais. “Transmitíronnos que a súa comida é sabrosa, variada, equilibrada e nutricionalmente idónea, así que aos nenos vailles gustar e van notar o cambio”, explica o alcalde, quen se reuníu esta semana co representante de Aramak en Galicia e a directora do CEIP Humberto Juanes para coñecer de preto as principais inquedanzas ou dúbidas.

“As expectativas son altas e están comprometidos a cumprilas, a alimentación das crianzas de Nigrán non é un asunto menor, por iso levamos anos de loita coa Xunta ata conquerir este resultado”, indica o alcalde, Juan González, quen recoñece que “a situación que había era insostible”. “As queixas eran fragrantes e tiñamos máis que contrastado que o menú que se elabora directamente no CEE de Panxón é dunha calidade moi superior aos dos demais colexios, e non estabamos dispostos a que se discriminase ao alumnado da ensinanza pública dentro dun mesmo municipio”, destaca.

“O propósito é a mellora do servizo cun cambio substancial en todos os aspectos: calidade, cantidade e adecuación nutricional, e cremos que a cociña do CEIP Humberto Juanes pode humanizar un servizo que estaba deshumanizado e que agora pode incluir platos que nin se podían polo transporte (100 km) e o horario no que se ten que cociñar para que chegue a tempo ao centro”, sintetiza o rexedor.

O maior desfile de ‘Xigantes e Cabezudos’ que se recorda na Historia do Concello de Nigrán abrirá este venres 18 de agosto ás festas de As Angustias, que se extenden ata o domingo no devandito torreiro. Isto é posible grazas a Nuria Zúñiga e ao seu pai Aníbal, que o ano pasado se propuxeron recuperar esta tradición restaurando as catro cabezas das que dispuñan na ‘Asociación Cultural As Angustias’ (un pallaso, unha anciana, un popelle e un diaño) e, neste ano, redobraron a súa aposta ao realizar durante todo o verán un obradoiro infantil do que xurdiron unha decena de animais. A estas novas pezas e ás vellas se sumarán tamén o touro e o anano propiedade do Concello de Nigrán e que tamén repararon altruístamente. En total, serán quince cabezas e ous dous xigantes de sempre (estes estrearán vestimenta) e partirán ás 19:30 horas desde a Praza do Concello cara o torreiro xunto á treboada ‘Son Galego de Donas’.

“Desde o Concello de Nigrán estamos comprometidos coa preservación das nosas tradicións e unha delas é esta, que estaba xa case perdida”, sinala o alcalde, Juan González, quen facilitou desde o Concello a promoción do obradoiro nos colexios CEIP Humberto Juanes (Nigrán) e CEIP da Cruz (Camos) achegando unha treboada para a ocasión. A maiores, a través do programa municipal ‘Música nas Parroquias’, que se financia a través da liña 2 do Plan Concellos da Deputación de Pontevedra, o consistorio achega 4.000 € á Comisión de Festas das Angustias para contratar as bandas de música do sábado e domingo ás 10:30 horas (Banda de Música de Arcade e Belesar, respectivamente).

“O ano pasado restauramos ás catro cabezas que tiñamos e lle fixen unha de oso panda á miña filla para volver a desfilar cos dous xigantes despois de catro anos de parón”, explica Nuria Zúñiga, profesora de música e ‘manitas’ e quen herdou esta afición do seu pai Aníbal (presidente da comisión de festas) e lla transmitíu aos seus dous fillos. “A cabeza que lle fixen a India gustou tanto aos rapaces que se nos ocurríu facer este obradoiro e funcionou de marabilla, con dez familias de Nigrán apuntadas para realizar cadansúa peza”. O resultado foi un ‘arca de Noé’ composta por koalas, osos panda, gatos, elefantes, leopardos e cans que botarán a andar o venres grazas aos corpos de nenos e nenas de entre 4 e 12 anos.

“O traballo parte dun globo e a partir de aí se lle pega papel e cola para darlle voume e cartón e máis papel para outorgarlle formas, ao final se lle engade papel hixiénico e cola para alisar e se pintan”, explica Nuria, quen admite que o principio non foi nada fácil. “Os globos desinfláronse pola calor e practicamente tivemos que ‘revivir’ as caretas para recompoñer a forma, pero logo todo foi sobre rodas”. “O ano que ven queremos repetir o obradoiro porque é o mellor xeito de manter viva esta tradición e de que sexamos unha gran comparsa en Nigrán”, sinala esta filla e nai de ‘cabezudos’ das Angustias.

Festa das Angustias

A festa das Angustias arranca o venres 18 de agosto co desfile e posterior tirada de fogos ás 20:00 horas para continuar cunha festa DJ desde as 22:00 horas. O sábado 19 sigue coa Banda de Música de Arcade ás 10:30 horas e pola noite coa verbena a cargo de Galia e Alaska. O domingo remata coa Banda de Música de Belesar (10:30 horas) e pola noite coas orquestras Ritmo e Furia Joven.