nadal 2018 nigran

Nigrán facilita á veciñanza as xestións relacionadas con abastecemento e saneamento

O Concello de Nigrán e Aqualia, empresa responsable da xestión do auga na localidade, veñen de presentar á veciñanza Smart Aqua, unha aplicación para dispositivos móbiles e tablets, Android e IOS, gratuíta e desenvolvida pola empresa para ofrecer o servizo máis completo aos cidadáns que, con este sistema, poderán realizar todas as xestións relacionadas co Servizo de Augas (abastecemento e saneamento) no momento desexen, da forma máis sinxela e cómoda, ao alcance da súa man.

Juan González, alcalde de Nigrán, amosaba a súa satisfacción pola posta en marcha desta iniciativa que simboliza, dixo, “un paso máis na comunicación aberta, transparente e próxima aos cidadáns e supón unha canle máis que aporta grandes vantaxes como optimización do tempo, axilidade das xestións, atención permanente...".

Así, esta aplicación non só permite realizar xestións que ata a data podían realizarse na oficina, por teléfono ou a través da web (como modificación de datos, consulta de consumos, envío de autolecturas con fotografía, pago de facturas, consultas e solicitudes) se non que, a diferenza doutras aplicacións, Smart aqua permite comunicar directamente as incidencias aos usuarios afectados a través dun sistema de alerta (por exemplo, se se vai a producir un corte de auga programado nunha rúa por unha obra, mándaselle unha mensaxe aos usuarios que viven nesa zona para avisarlles con anterioridade).

smart aqua 02

Outra funcionalidade novidosa que fai desta aplicación a máis completa do mercado é a posibilidade de que o cidadán, sexa cliente ou non do Servizo Municipal de Augas de Nigrán, poida notificar avarías de xeito preciso ao incluír un sistema de xeolocalización e envío de ata 2 fotografías da incidencia. Esta información chega directamente á oficina de Aqualia, que desta forma poderá optimizar os tempos de resposta. No caso de Nigrán, que conta con 224 km de rede municipal de abastecemento, 183 km de colector municipal de saneamento e 34 estacións de bombeo de augas residuais, este sistema aporta moito valor á hora de actuar con maior rapidez.

Smart Aqua aspira a consolidarse como unha canle de comunicación e información para o cidadán: información sobre novas campañas, noticias, enquisas (a través das cales se interactuará e pulsará a opinión dos cidadáns), notificacións, entre outras. Tamén ofrecerá información concreta en relación con Nigrán: información sobre a orixe do auga, pegada hídrica, tarifas, modos de pago, e noticias do municipio. Estas funcionalidades converten a Smart aqua na aplicación máis completa ata a data no mercado.

A concesionaria Aqualia lembra a todos os veciños e veciñas que ten as súas oficina na Avenida Val Miñor Dous con teléfono de atención gratuíta no 900 813 357 e de información e avarías no 900 813 047, ademais da web www.aqualia.es. Toda a información sobre a nova aplicación a poden atopar os veciños e veciñas, nesta ligazón.