O meu andel

Antía Yáñez, «Senlleiras»

Antía Yáñez é unha desas novas voces femininas que están a axitar a literatura galega actual. «Senlleiras» é a súa primeira novela para adultos e nela, amais dun discurso reivindicativo do papel da muller na sociedade, desprega unha madurez narrativa que non é habitual en autores tan novos coma ela. Lembremos que con este texto acadou o premio «Illa Nova», argallado por Galaxia para descubrir talentos moi novos e que está a dar, en só dúas edicións, excelentes froitos.

Roi Vidal Ponte, «Poesía. Materiais para montar unha escena de cama»

A pesar do seu título, «Poesía» é unha peza teatral; é a proposta coa que Roi Vidal Ponte gañou a XII edición do Premio Abrente de textos teatrais, argallado pola Mostra de Teatro de Ribadavia, e acaba de ver a luz en edición impresa da man, como é habitual, da editorial Difusora de Letras, Artes e Ideas. Trátase dunha peza de corte experimental e que, se seguimos as instrucións do autor, pode dar pé a numerosas interpretacións diferentes da propia obra e a que cada representación sexa sempre distinta da anterior.

Xavier Alcalá, «The Making Of»

A literatura galega tennos acostumados a unha imaxe da emigración que me atrevería a cualificar de “romántica”, no sentido decimonónico da palabra: personaxes sen un futuro claro que buscan fortuna fóra da terra con resultados incertos, sempre dende unha perspectiva morriñenta e idealizada.

Isabel Blanco, «María Vinyals, un talento rebelde»

O tándem Isabel Blanco / Luz Beloso está dando resultados gratificantes no campo da literatura infantil. A primeira, a través de delicados textos para nenos; a segunda, ao cargo das ilustracións. Xa van tres libros de ficción elaborados por ambas, adicados a un personaxe creado para a ocasión, Rosaura, en distintas tarefas (cociñeira, mariñeira e cesteira); agora veñen de embarcarse nun proxecto distinto, dirixido ao público xuvenil e non exento de risco. Porque as biografías non acostuman a ser as lecturas máis demandadas polos rapaces. Pero quizais sexa porque non se lles presentan adaptadas a eles e de tal xeito que lles resulten atractivas. E tal é o enfoque que as autoras lle dan a esta nova aventura.

Marta Dacosta, «Labirinto ou memoria»

Marta Dacosta afirma que «Labirinto ou memoria» é o reverso do seu anterior poemario, «A casa da avoa», e quizais non lle falte razón. Se naquel caso acudía á figura da súa avoa como representación simbólica da muller, e xogaba coa memoria como elemento motriz do conxunto, neste caso volve a retomar o fío das lembranzas para construir unha viaxe introspectiva a un pasado real ou imaxinado, dende un presente que albisca o futuro próximo. Non, non é un trabalinguas inventado para a ocasión, pero é doado imaxinar que para comprendelo convén dar algunha explicación máis.

Abel Tomé, «A noite do corvo»

Se non fose unha ousadía identificar con etiquetas musicais os estilos literarios, case podería afirmar que estamos diante dunha novela de blues neogótico. Si, é unha terminoloxía un tanto confusa, pero que pode axudar a delimitar e encadrar con certo tino a proposta coa que Abel Tomé se nos presenta na súa primeira aventura como narrador á fronte da novela de intriga “A noite do corvo”.

O relato nace da investigación dun asasinato múltiple e está narrado en primeira persoa polo seu protagonista, o inspector Gonçalves. Trátase dun personaxe bastante peculiar, que responde en moitos aspectos ao prototipo de investigador cínico e que está de volta de todo (velaí a afección ao jazz clásico, ao tabaco ou aos licores de alta gradación, mesmo a ceibar o gatillo), pero que atopamos adobiado con elementos característicos que o dotan de personalidade propia. Elementos que van dende un pasado tormentoso ata unha importante dose de tenrura, que mesmo contrastan con certos comportamentos paranoides. Dous policías que colaboran na investigación, a pesar do seu papel secundario, fan de perfecto contrapunto do protagonista.

A novela podería pasar por unha homenaxe aos clásicos da intriga policial, máis hai unha atmósfera ao longo do relato que o sitúa máis cerca das historias de terror decimonónicas, mistura que non deixa de aportar aire fresco á trama. Un dos, ao meu entender, grandes acertos de “A noite do corvo”, é o escenario no que se desenvolve e principal instigador desa atmósfera: a illa de Gothard, un lugar aillado, que sobrevive no tempo sobre costumes de corte feudal baixo o dominio dun par de familias que veñen rexindo o seu destino dende tempos inmemoriais.

O traballo de Abel Tomé respecto da creación deste escenario é profundo e atinado, chegando incluso a recrear unha mitoloxía propia e certos usos que hoxe semellan arcaicos pero que axudan a manter a estrutura caciquil que a domina. Gothard é un lugar senlleiro no que as autoridades permiten certas cousas ao amparo da tradición, que están vedadas ao resto de poboacións. Sería doado buscar paralelismos entre esta Gothard imaxinaria (e outros lugares mencionados, como Beth e Galataz) e situacións contemporáneas, pero non creo que esa fose a intención do autor. Máis ben semella que lle servisen como fontes de inspiración.

A historia que relata o inspector Gonçalves é das que enganchan, e por diversas razóns. En primeiro lugar, como queda dito, pola atmósfera que consegue na recreación dese lugar imaxinario, presente ao longo da totalidade do relato. En segundo lugar pola dosificación de información, que leva ao lector a adentrarse na historia na procura da solución do caso, chegando a competir co propio inspector. E en terceiro lugar, e aquí vexo outro dos grandes acertos da novela, pola linguaxe empregada. Gonçalves é, como queda dito, un cínico de volta de todo. E é dende a atalaia do seu cinismo dende a que relata a historia cunha linguaxe directa e sen mesura nin censura. Frases curtas, reiteración de ideas e de conceptos, apreciacións subxectivas e outros recursos que, amais de espir para nós a personalidade do protagonista (e narrador), conseguen inducir unha lectura fácil e absorvente.

a noite do corvoAbel Tomé
A noite do corvo

 

Editorial: Galaxia
204 páxinas

 
Suscribirse a este canal RSS